Artxiboen Nazioarteko 7. Astea

Nafarroako Errege Artxibo Nagusiak bat egingo du Artxiboen Nazioarteko 7. Astearekin, ekainaren 11tik 14ra bitartean egingo diren jarduera presentzialen, sarbide librekoak eta doakoak, programarekin batera.

Artxiboen Nazioarteko Eguna ekainaren 9an ospatzen da, 1948an UNESCOren babespean Artxiboen Nazioarteko Kontseilua sortu zela ospatzeko. Efemeride hori, kontseilu berak (International Council of Archives edo ICA) aldarrikatu zuen 2008an, zeinak 2019an ospakizun-egunak luzatu baitzituen, Artxiboen Nazioarteko Astea sortuz, urtero lelo desberdina duena. 

2025. urte honetakoa ‘#ArchivosAccesibles: Archivos para tod@s’ da, zeina 300 parte-hartzaile (artxibozainak, dokumentuen kudeaketan adituak, ikertzaileak, ikasleak eta antzeko eremuetako profesionalak) baino gehiagori egindako inkesta baten bidez aukeratu baita. ICAren webguneak dioen bezala, “artxiboek aro digitalean eboluzionatzen duten heinean, artxiboko edukietarako sarbide handiagoa emateko gaitasuna inoiz baino erabakigarriagoa bihurtzen da”.

Nafarroako Errege Artxibo Nagusiko jarduerak

Nafarroako Errege Artxibo Nagusiak (AGN) ‘Juana de Evreux, reina de Navarra (1329-1349)’ hitzaldia antolatu du ekainaren 11n, asteazkena, 19:00etan, Iñigo Mugueta Moreno irakaslearen eskutik. Sarrera librea izango da aretoa bete arte.

Bestalde, askotariko bisita gidatuak eskainiko ditu aurten. Hasteko, ostiralean, ekainaren 13an, eguerdiko 11etan, ate irekien jardunaldia egingo du, non bisitak gaztelaniaz eta euskaraz egingo diren. Ibilbidean zehar, parte-hartzaileek Rafael Moneok diseinatutako eraikina, Iruñeko Errege Jauregi gisa duen jatorria, gaur egungo funtzioak eta egunero egiten diren artxibo-lanak eta dokumentazioa zaharberritzeko lanak ezagutu ahal izango dituzte. Ostiralean bertan, hilak 13, 19:00etan, bisita gidatua egingo da ‘Beste garai bateko irainak. Nafarroa XVI-XVII. mendeak’ izeneko erakusketara, Jesús M. Usunáriz Garayoa irakaslea eta Cristina Tabernero irakaslea izandako komisarioen eskutik. Gainera, ekainaren 12an eta 19an, ostegunetan, 12:00etan, zaharberritze-tailerrak bisitatu ahal izango dira, irailetik aurrera inauguratuko den "Karlos III.a. Gobernu onaren erregea" erakusketaren xede izango diren dokumentuekin egindako lanak “in situ” ikusteko. Edozein bisita gidatuetara joateko izena eman beharko da 848 42 46 67 telefonoan, astelehenetik ostiralera goizez deituta.

Asteari amaiera emateko, ekainaren 14an, larunbata, 12:00etan, AGNko lorategi patioan ‘Intsektu kutunak. Hori da hori, uda honetan datorkiguna!’ izeneko kontzertua izango da, zeinak Fernando Palacios artistaren gidoia eta narrazioa eta Beatriz Pomés (flauta), Marta Ramírez (biolina) eta Igor Saenz (biolontxeloa) musikarien interpretazioak izango baititu. Georg Philipp Telemann, Kaija Saariaho, Ernest Köhler, Santos Laspiur, Estanislao Luna, Ludwig van Beethoven eta Fernando Palaciosen lanek osatuko dute errepertorioa. Sarrera librea izango da aretoa bete arte.

Bideoak