Interpretea(k): Iruñeko Ganbara Abesbatza / Coral de Cámara de Pamplona
Gipuzkoako Eibar herrian jaio zen arren, Andrés de Escareguik Nafarroan egin zuen ibilbide musikal osoa. Iruñeko katedralean abesbatzako haur gisa sartu zen eta, 1738tik, kaperako maisu izatera iritsi zen. Bere garaian nolabaiteko errekonozimendua lortu zuen, eta horren erakusle da Espainiako monarkiari estuki lotuta zegoen Escorial monasterioan eta Mexikoko katedraletan, hala nola Guadalupen, zenbait lan egotea. Bere estilo musikala barrokoaren eta estilo galanteen artean kokatzen da. ¿Qué hace desnudo en la Cruz? izeneko lanean aurkezten duen kontrapuntu- eta deskribapen-estilo musikala lehenengoarekin lotzen da.
2020ko irailaren 14tik 18ra.
Iruñeko Ganbara Abesbatza
Luis Morondo Maisuak sortu zuen Iruñeko Ganbara Abesbatza erakundea 1946an, XV., XVI. eta XVII. mendeetako musika jorratzeko helburuarekin. Hala ere, bere errepertorioa konpositore garaikideei bereziki lotutako ahots-musika mota guztietara zabaldu zuen. Munduko Nazioarteko Jaialdi garrantzitsuenetan ere parte hartu du: Granadako Nazioarteko Musika eta Dantza Jaialdia, Grazeko Nazioarteko Jaialdia, Donostiako Musika Hamabostaldia, Vienako Nazioarteko Jaialdia eta Musika Koral Hispanoamerikarraren Zikloa Habanan, besteak beste. Ehun disko baino gehiago argitaratu ditu Lumen, Telefunken, Columbia, Philips, Wernminster, Movieplay, ARSIS eta RTVE zigiluekin. Era berean, agertoki entzutetsuetan aritu izan da, esaterako, New Yorkeko Concert Hallen eta Metropolitan Operan Housen, Vienako Konzerthausen, Buenos Aireseko Teatro Colónen, Habanako Gran Teatron, Montevideoko Teatro Sodren edo Florentziako Teatro della Pergolan. Nafarroako Gobernua, INAEM-Kultura Ministerioa eta Iruñeko Udala ditu babesle, eta Diario de Navarraren eta Nafarroako Kutxa Fundazioaren laguntza jasotzen du. 2005ean, Lanaren Merituaren Urrezko Domina jaso zuen eta 2018an, aldiz, Vianako Printze Saria.
David Gálvez Pintado
Zuzendaria
Valentzian jaio zen, non solfeoko, pianoko, koru-zuzendaritzako eta konposizioko goi-mailako ikasketak amaitu zituen. Geroago, Budapesteko Ferenc Liszt Akademiara joan zen eta bertan Abesbatza, Orkestra eta Konposizio Zuzendaritzan espezializatu zen. Opera-produkzioetan eta kontzertu sinfonikoetan parte hartu du, musikari eta talde ospetsuekin batera. Mundu osoko lehiaketa, sinposio eta hitzaldietan parte hartu du. Konpositore gisa, bere lanak New Yorkeko Carnegie Hall, Chicagoko People’s Music School, Limako San Marcos Kultur Etxeko Areto Nagusia, Panamako Antzoki Nazionala, Valentziako Palau de la Música eta Palau de Sofía Les Arts bezalako kontzertu-areto hoberenetan antzeztu dira. Hungariako Musikarien Fórum Nacional eta Premis Catalunya de Composició Coral (2006) bezalako sari garrantzitsuak ere jaso ditu. Iruñeko Ganbara Abesbatzako zuzendaria da eta baita 2008an sortu zeneko Erdialdeko Amerikako Orkestra eta Koru Gaztekoa (JOCCA) ere.
[-] Ezkutatu
[+] Gehiago irakurri
